អង់គ្លេស៖ Manchester City បានប្រកាសពីការចុះហត្ថលេខានាំយកខ្សែបំរើអង់គ្លេស Jack Grealish ពីក្លិបបាល់់ទាត់ Aston Villa ក្នុងតម្លៃ ១០០ លានផោន ខណៈការប្រកាសផ្លូវការបានធ្វើឡើងកាលពីយប់មិញនេះ។
ការមកដល់ទឹកដី ETIHAD Stadium ក្នុងកិច្ចសន្យារយៈពេល ៦រដូវកាល កីឡាករសញ្ជាតិអង់គ្លេសវ័យ ២៩ឆ្នាំរូបនេះ ទទួលបានអាវលេខ ១០ ដែលជាលេខអាវរបស់ Sergio Aguero ដែលបានចែកផ្លូវ និងទៅចូលរួមជាមួយ FC Barcelona ក្រោយចប់រដូវកាល ២០២០/២១ កន្លងទៅ។
គួរឱ្យដឹងថា រឿងពិសេសបំផុតពីការផ្ទេរមកកាន់ទឹកដី Manchester City ពី Aston Villa ក្នុងតំលៃ ១០០លានផោននេះ បាននាំឱ្យ Grealish ក្លាយជាកីឡាករដែលមានតម្លៃខ្លួនថ្លៃបំផុតក្នុងប្រវត្តិសាស្រ្តក្របខណ្ឌ English Premier League និងបំបែកកំណត់ត្រារបស់ Paul Pogba ដែលផ្ទេរមកកាន់ Manchester United ពីក្លិបសេះបង្កង់ Juventus ក្នុងតម្លៃ ៨៩លានផោនកាលពីឆ្នាំ ២០១៦។
Jack Grealish នឹងត្រូវបង្ហាញខ្លួនជាមួយ Manchester City នៅថ្ងៃសៅរ៍ ចុងសប្តាហ៍នេះផ្ទាល់ ក្នុងការប្រកួតទល់នឹង Leicester City នៃពានរង្វាន់ FA Community Shield នាកីឡដ្ឋានជាតិ Wembley របស់អង់គ្លេស៕
